Arrasaten euskaraz bizitzeko aukerak zabaltzea, horretarako espazioak sortuz zein herritarren eta entitateen hizkuntza jarreran eta portaeran eraginez.
Euskararen Historia Soziala
XX. mende hasieratik euskarak Arrasaten izan duen bilakaera, eta, bereziki, berau bultzatzeko egindako lana jaso eta ezagutzera ematen dugu egitasmo honekin. Nekez baloratu eta maitatuko dugu daukaguna berau lortzeko egin dugun esfortzua ezagutu ezean.
Lasterketa
“Euskaraz egin bide” lelopean Oñati eta Arrasate lotzen dituen herri lasterketa antolatzen dugu.
Solasaldiak
Euskaldunon komunitatea elikatzea da ekitaldi hauen helburu nagusia, askotariko gaiak eta denetariko gonbidatuak gurera ekarrita.
Hizkuntza eskubideak
Entitate batera joan eta zerbitzua euskaraz ukatu dizute? Bada, ez zaitez amorruak jota geratu. Etorri AEDra eta kexa bideratzen lagunduko dizugu. Entitate publikoek zein pribatuek euskaldunon hizkuntza eskubideak errespetatzea eta bermatzea da gure egitekoa.
Euskaraldia
Euskaltzaleen Topaguneko bazkide gara eta, horrenbestez, hizkuntza ohituren aldaketa helburu duen ariketa kolektibo honen antolaketan parte hartzen dugu, sorrera prozesutik.
Sustapena eta elkartasuna
Euskal Herrian ugari dira euskaltzaleon bultzada behar duten ekimenak: Errigoraren “Nafar hegoaldeko uzta, euskarari puzka”, Xiberoko Ikastolen “Ikaskoli”, Kontseiluen kanpainak, Herri Urratsera zein Nafarroa Oinezera joateko autobusak, Korrikako batzordeak… horiek guztiak eta gehiago laguntzen ditugu.
Zahar-Berri mintzapraktika
Euskaltegian egiten dituzun orduak ez direla aski? Kalean ere praktikatu gura duzula?
Euskaraz hitz egiteko gaitasuna hobetu nahi duzula? Ikasketa prozesuan daudenei lagundu,
euskara gehiago eta hobeto erabili dezaten? Bada, Zahar-Berrin daukazu horretarako espazioa.
Parte hartzeko hiru aukera daude:
1
Berbalagun taldeak
Astean behin eta ordu batez euskaraz aritzeko elkartzen diren praktikagileek osatzen dituzte Berbalagun taldeak. Bidelagun bat izaten dute, irakasle rola bete gabe, eusle lana egiten duena.
2
Asteburuko irteerak
Berbalagunen mintza-sarea zabaldu eta aisialdi tarteak baliatuz euskara praktikatzeko aukera gehiago ematea dute helburu irteera hauek. Ikasturtero bost-sei egiten ditugu, gehieneak Debagoieneko beste mintzapraktika programekin batera.
3
Euskaltegiko ekintzak
Hilean behin, Debagoieneko AEK-ko eta Udal Euskaltegiko ikasleak Zahar-Berrira hurbiltzen dira, ekintza jostagarri baten bueltan euskara praktikatzeko.
Euskara praktikatu nahi?
Euskalduntze bidean daudenei bultzadatxoa eman?
zatoz, bada, Zahar-Berrira!
